朱紫嬈生日推出新專輯 雙喜臨門 藝人相片, 朱紫嬈

starphoto

朱紫嬈生日推出新專輯 雙喜臨門


     於8月3日踏入36歲生日嘅實力歌手朱紫嬈(Khloe)因疫情限聚下,連續三日分批同家人、男朋友、歌手朋友仲有樂迷一齊慶祝。日前仲喺觀塘舉行咗《花.醉》新碟發佈會暨生日派對,宣佈其新專輯正式面世。今次專輯裏面一共收錄咗四首歌: 《花.醉》,《怪誕》,《最愛是誰》,《明.滅》。活動上Khloe更即席首次獻唱出最新派台歌《明.滅》。Khloe話呢首歌係呢張專輯Project裏面嘅最終章,成個概念係想鼓勵大家經過唔同階段唔同經歷過程尋找番自我,面對自己嘅優點甚至缺點,去踏出去成就更好嘅自己。Khloe更話今次配合現今潮流,首次以Digital EP數碼專輯形式推出新作:「感覺好新鮮,宜家呢個時代真係無咁多人屋企有CD機放隻實體CD入去播。除非之前出高質靚聲HI-FI發燒碟要達到靚聲出平一定要出實體碟。今次新嘗試,朋友都有上網買我專輯嘅歌,㩒一個制就送到比生活上需要力量同鼓勵嘅朋友,當係心靈雞湯嘅音樂禮物。」活動上仲有幫Khloe籌備新碟的製作功臣黃浩邦(Dr. X), 佢表示今次合作欣賞Khloe跳出自己以往的曲風,搵佢合作造出電子風新風格的作品。Khloe亦表示入行十年了,想嘗試唔同嘅曲風。亦花咗好長時間去Dr. X嘅錄音室擴闊自己對電子音樂、EDM、Rap等嘅音樂新領域。為求有音樂創作靈感,仲經常日夜顛倒Jam歌到朝早雀仔叫先番屋企。而認識了Khloe很久的合作作曲人翁瑋盈(Janet)都話新曲風作品有驚喜,電子風更突顯Khloe嘅女人味。出同場仲有亞洲先生傅晉杰(Leo)擔任司儀, 而在時興網上開Live Show會樂迷嘅世代之下,Khloe早前都嘗試出佢嘅第一次,就係喺自己嘅平台主持六月限定嘅一連四集Live Music Show搵嚟啱唔同主題嘅嘉賓Jam歌同傾心事,當中曾經參與嘅黃劍文(Kimman),吳筱茵(Candy),可嵐(Colleen), 陳凱彤(Lillian)同謝高晉(Ko Chun)都有現身發佈會撐場。可嵐(Colleen)仲一早起身偷出Lunch Time休息時間喺自己餐廳走出嚟支持:「朋友雙喜臨門當然要支持。之前好開心喺Live Music Show同Khloe Jam歌,又將大家平時會傾計分享嘅事同樂迷即時討論,等大家有同樣問題糾結嘅人有所鼓勵同共嗚。二人又表示可以計劃一下推出合唱歌,可能可以係以女性為主題嘅歌曲。最後由好友許嘉浩(Karl Hui)送出以紫色花配合花醉主題嘅蛋糕同花香香檳送上驚喜,大家亦配合Beatbox唱出生日歌慶祝。Khloe表示生日願望係疫情快過,回復正常生活,可以搞實體版音樂會。當然希望新碟大賣,樂迷鍾意佢新嘗試嘅新歌。問到男朋友慶祝時有咩特別表示? 佢話大家簡單食一餐鍾意食嘅西餐就好滿足。仲話無壓力唔急住結婚唔急住生BB,新碟面世就係佢新生嘅BB。